2024·10·23
Bideogintza eta sormena lantzeko helburua duen Arnasetik lehiaketa abian da. 10 eta 16 urte arteko gazteei zuzendua dago eta, urriaren 31ra bitarte zabalik egongo da lanak aurkezteko aukera.
3 maila ezberdinetan banatua dago; LH5-6; DBH 1-2 eta DBH 3-4. Gehienez bi minutuko bideoak egingo dituzte parte-hartzaileek eta maila bakoitzak gai ezberdina jorratu beharko du.
LH5 eta 6. mailakoen gaia Txokorako bidea izango da. Norberaren txoko kuttunen berri ematea izango da sortutako bideoen helburua.
DBH 1 eta 2 mailakoek, urtean zehar iristeko zain egoten diren egun handiaren inguruko bideoa egingo dute; herriko jaiak, inauteriak...
DBH 3 eta 4koek, 'Bosteko katea' osatu beharko dute, haren larruan jartzea gustatuko litzaieken herriko bost pertsona aukeratuz.
Sari potoloak banatuko dituzte. Maila bakoitzeko irabazleak 500 euro jasoko ditu zenbait ekimenetan gastatu ahal izateko: Irrisarri Land, Durangoko Azoka, Irabazi arte eta Goazen, Gure Zirkua eta beste hainbat. Publikoaren saria ere banatuko da, beste 500 euroko balioarekin.
Arnasguneetako gazteei zuzendutako lehiaketa da honakoa, euren herrietako errealitatea erakusteko aukera izan dezaten.